Panc seri ra ver aşma teşrîna verêni de mi heyatê xo de yew qeraro weş da û mi ino blog akerd. Ino qerar, qerarê tewr raştanê ra yewî yo ke mi heyatê xo de girewto. Ez ewro xo dima ewnîyena û pizeyo safî ra vana, çi weş ke mi ino blog akerdo.
Ewtîya de panc serî xo temamkerdiş, mi de hîsê
serkewtişî virazeno. Ez wexto ke inê cûmleyan nusena, hîso ke qelbê mi de tewr
vîş virazîyeno, hîsê serkewtişî yo.
Hewlê xo reyde xirabê xo reyde mi panc serî temam kerd. Ino
panc serî de yew aşmi bî ke mi nuşteyê a aşmi sereyê a aşmi de nuşt. Yew aşmi
zî bî ke nuşteyê aye, aşma binê rê mend. Tayê aşman de zî moral û motîvasyonê
mi ca de bi û mi di nuşteyê weşanayî. Labelê semedê her aşmi ra tewr tayê yew
nuşte weşanayîş, mi rê sey yew odew bi. Eke ez nizdîyê peynîya yew aşmi ameya û
mi hema nuşteyê a aşmi nêweşanayo, qelbê mi de aqilê mi de yew bêkeyfeyi, bêreheteyi virazîyaynî. Zereyê mi de yew hîsê temamnêbîyayîşî peyda bînê.
Ewro wexto ke ez xo dima ewnîyena, eke ez bi hawayo serkewte
ino blog de sera pancini resaya, wesîleya qaydeyê ‘’her aşmi tewr tayê yew
nuşte’’ reyde mi ino kerdo. Çimkî ino qayde yew bar milê mi wenaynî. Seke şima zî
zanê semedê serkewtişê yew xebati ra, biqayde û biîstîqrar xebetîyayîş zaf
mûhîm o. Mi zî rojo ewilîn ra xo rê ino qayde rona û biîstîqrar heta ewro mi
dewom kerd.
Heto bîn ra sewbina çîyê estê ke dewomkerdişê ina xebati de tesîrê înan mi ser estbîyo. Înan re yew, wareyê nuştekî yê ziwanê kurdî de bêîstîqrareya xebatan a. Ê ke ziwanê kurdî reyde eleqedar benî weş zanê ke ino ware de bêîstîqrareyi, bi hawayo îstîqrar dewam keno. Yew kovari, rojname yan zî yew komxebati yew heyecan û daşinasnayîşo pîli reyde destpê kena. Labelê zafê di hîrê hûmari bile zor veynenî. Ina kemaneya wareyê nuştekî yê ziwanê kurdî, semedê ino blogî de dewom kerdişî ra yew quwwet dano mi. Kare nêmcetî û nêmxebatî, hewesê kesê ke wazenî semedê ziwanê kurdî ra çîyêk bikerî, şiknenî. Labelê mi de ina rewşi tam ters a.
Yewna çîyo mûhîmo ke semedê îstîqrarê ino blogî ra hêz dano
mi, eleqeyo kêmo ke nuşteyanê mi nawnîyeno yo. (Nuştox tîya de peşmirîyaJ) Ez raya ewilîn a ke
behsê eleqeyê nuşteyanê xo kena. Eya, goreyê mi eleqeyo ke nuşteyanê mi
nawnîyeno kêm o. Tayê nuşteyê mi estê ke 30-40 ray wanîyayî… Ino zaf yew hûmara şenik a. Kê wexto ke bi hawayo
pêroyî ewnîyenî zî, acêr qayme her nuşteyê mi dormareyê 70-80 ray wanîyeno.
Tabî ez wanîyeno vana, labelê inê hûmarî, hûmarê tiknayîşî yê. Beno ke tayê
mêrdimî lînkê nuşteyan tiknayo, labelê bi temamî nuşteyî nêwendo yan zî qet
nêwendo.
Nuşteyê ke ez ino blog de nusena ge ge yew di rojê mi gînê.
Heta ke mi şina, ez sereyê xo ser dejnena û wazena ke çîyêko biqalîte biveja orte.
Labelê hewna zî hûmara wendişê nuşteyan nêzêdîyeno. Beno ke ez tayê çîyan xelet
kena, nêzana. Labelê ino problem, tene problemê mi nîyo, ez ino zî zana. Çimkî
wareyê nuştekî yê ziwanê kurdî de problemê tewr girdan ra yewî zî kêmbîyayîşê
eleqe yo. Ina rewşa xirabi beno ke moralê kesê ke ziwanê kurdî ser şuxulîyenî,
bikêmna. Labelê ey mi ewtîya de zî tam ters o. Hûmara wendişê nuşteyan mi rê qet mûhîm nîya. Raşta zî ez
kêm kêm hûmara wendişê nuşteyanê xo ra ewnîyena. Labelê ez wazena ke nuşteyê ke
ez ande înan ser o sereyê xo dejnena, wa dahîna vîş însanan biresî û dahîna vîş
însanî înan ra havil biveynî.
Nika ez wazena nuşteyanê ino panc serî tesnîf bikera. Teşrîna
verêni ya 2019î ra heta ewro ino blog de 67 heb nuşteyî weşanîyayî. Muhtevaya
inê nuşteyan ez şina inawa îzah bikera:
-
5 nuşte: Rexneyê roman/hîkaye ûsn
-
12 nuşte: Sey estanik, mesela, deyîr, destan ûsn
çîyê folklorîkî
-
15 nuşte: Ceribnayîşo edebî(deneme)
-
5 nuşte: Hîkaye
-
5 nuşte: Krîtîk
-
13 nuşte: Rexneyê fîlmî
-
8 nuşte: Vîrameyîş
-
4 nuşte: Nuşteyî sewbina nuştoxan
Bi hawayo pêroyî kê şinê 67 heb nuşteyan inawa tesnîf bikerî.
Ewro ra pey amancanê mi ra yewî zî muhtewaya nuşteyan
zêdnayîş beno. Heta ke mi şina ez dahîna nuşteyanê zengîn û rengînan reyde ko
blog bixemelna.
Sey ino nuşteyê mi yewna nuşte, ewro ra panc seri dima ko
ino blog de biweşanîyo. Yanî ez ino nuşte ra pey, inawa yew nuşte ko wexto ke des serî
ino blogî qedîya binusa. Mela ez û şima ma pîya ay rojan biveynî. Mela linga
ino blogî kerra ver nêkewa!
Ez tîya de ino nuşte qedinena û wazena ke cêr de ca bida
nuşteyo ke tewr ewilî ino blog de ameyo weşanayîş. Ay rojî ra heta ewro panc
serî vîyartî û zaf çî bedilîyayî. Ez semedê ino ra wazena ke şima panc seri tapa
bera. Bêrî ma şêrî 27 teşrîna verêni 2019î…
27/10/2019
Semedê Destpêkerdişê Ra
Semedê xwu weş îfade kerdîş, fikiranê xwu eşkera kerdiş, yew pelê înternet akerdiş rewna mi vîr de yo. Ha ina roce ha ayê roce, mi tim sebixna û pawit, mi ecizeyi kerd. Axrik mi hîz da xwu û qeleme girewt xwu dest. Şima zî zanê ke destpê kerdiş, nîmeyê serkewtişo.
Pekî nîyetê mî çiyo? Ez wazena se bika?
Bi kilmî inê pelê xwu de ez her çî xwu nûsena.Yew sîndorê mî çino.Tîya de ez, kitaban, fîlman, belgefîlman û xebetanê zazakî ûsn. şîrove kena. Her çiyo ke mî waşt ez şîrove bika, ez kena. Qelema xwu tapa nêverdena. Mesela û hîkayeyan, idyoman, vateyê verînan û edetê kurdan ke mî eşnawitê, goştaritê, ez ewtiya de nûsena. Ez bi xwu awuqata. Hetta ke, gûcê qelema mî bes ke, ez meseleyanê hûqûqê, inê meseleyan ser şîroveyanê xwu û derheqê hûqûqê Tirkiya de zî nûsena. Beno ke şima inê humariteyanê mî ra teber, sewbina çiyan zî ewtîya de biveynî. Bi kilmî yew sîstematîk taqîp nêkena ez.
Kar û gûreyê bêqûsûr zî çino elbet.
La ino gûreyê mî de ko qûsûr dahîna zaf bo. Çinkî ziwanê ma hema tam nêronişto. Problemê çaresernêbîyayî zafi .Ez bî xwu zî tam hakîm ziwan niya. Ez semedê bonderbîyayişê zazakî hîç nêşîya yew qurs.Tena ez bi xwu kitaban ra bonder bîya. Semedê ino ra, ez nika ra efê xwu wazena şima ra. Qusir û xeta mî ra, ef û mexfîret şima ra. Ez şîroveyan, rexneyan û peşnîyazanê şima ra zî akerdeya û pawena. Nîyetê mi o yo ke, dêsê Zazakî de yew kerra zî ez rona. Eger ez serbikewa se, zaf keyfweş û zerrîweş bêna. Heta ke mî ra ame, ez xwu ver dana.Homa ardîmkar bo.
Bêziwan cûye nêbena.
Biciwîyo ziwanê ma.
Biciwîyo Zazakî ,Kirdkî,Dîmilkî û Kirmanckî...!
