DEYÎRA HUSEYNÊ HAJÎ Û LEYLA

Sereyê payîzî de ez semedê babeta tezê masterê xo ra şîbîya çand dewanê Pîranî de geyraybîya. Mi ino geyrayişî de zaf çî antê pêser. Gelek deyîrî, meseleyî, vateyî ûsn. Xisusen deyîrî goreyê mi wayirê cayêko cîya yî. Riyê ino ra eke yewer mi rê deyîri bivatinî zaf keyfê mi ameynî ü mi pey çar goşan ey goştaritinî. Mi hem deyîri goştaritinî hem zî ez hîkayeya a deyîri ti ra persaynî.  

Ino geyrayişê xo de mi zaf deyîrê weşî goştaritî û arêkerdî. Labelê înan mîyani ra yewi zaf bala mi anti. Xisusen hîkayeya ina deyîri. Nameyê ina deyîri ''Deyîra Husê Hacî û Leyla'' yo.  Çimkî ina deyîri meselaya Husê Hacî û Leyla sero vajîyaya. Semedo ke nameyê pîyê Husê Hacî yo, ti ra vanê Husê Haci. Husê Hacî û Leyla dewa Pîranî Pîrajmoni ra yî. Tirkî ina dewi ra vanê ''Kurşunlu''. Leyla zewijnaya ya. Mêrdeyê ya ra vanê Mistê Bêzi. Mistê Bêzi şino esker. Husê (Huseyn) zî Zelîxa reyde zewejnaye yo. Wexto ke Mistê Bêzi esker de beno Hus û Leyla waşteyeki kenî. Gama ke Mistê Bêzi eskereyi ra yeno, cenî qali têraçarnenî û ey resnenî. Mistê Bêzi şino pîyê Husî, Hacî Wisifê Şînî ra mesela vano. Pîyê Husî venday lajê xo dano û vano: “Lajê mi malê mi zaf o. Eke ti zewejînê bigîri pey qelindê yew cenî bidi.” La Huseyn qala pîyê xo nêgoştareno û nengan çîneno. Pîyê Husî, venday qewmê xo dano û barê xo wenano, dewi terk keno. 

Yew roj maya Husî Husî ra vana “bê zere de rakewi”, o vano “ney, ti cila mi banî ser o fîni”. Hus a şewi banî ser o rakeweno û Mistê Bêzi yeno pey tifingî ey kişeno. Ina deyîri maya ci vista Husî ser. 

Mi di tenan ra ina deyîri goştariti. Yewi dewa Kelkomî ra Omer Çelîk(Haj Omer), o binê zî dewa Zixirî ra Yilmaz Barlas. Kelkom(Kelekçi) û Zixir(Değirmenli) di dewî Pîranî yê. 

 

Ez cêr de hem ca dana wirdî qeydan hem zî ca dana vateyanê wirdî deyîrbazan. Yanî wirdî varyantanê deyîri zî nusena. Zaf ferqêko pîl çin o beyntarê wirdî varyantanî de. Qeydê Yilmaz Barlasî nizdîyê hîrê deqqa ancax est o. Labelê ey Haj Omerî nizdîyê pancês deqqa yo. Semedo ke boyutê vîdeoyê Haj Omerî vîş o, blogger nêwena tîya. Mi zî ino vîdeo wena Google Drîve û lînkê ci cêr de rona. Şima şinê pey ay lînkî hem vîdeo bigoştarî hem zî bironî.

Mi mehnaya nameyê xisusî ke deyîri de vêrenî û sewbina îzahatan zî vera cûmleyî de bişeklo îtalîl nuştî.

Varyantê Haj Omer Çelikî - Dewa Kelkomî Ra

Lînkê vîdeoyê Haj Omerî :

Semedê vîdeo ra tîya bitiknî.

Vateyê Deyîri:

Gidî va Husê m’ ser’ Pîrajmonê ma dimon o ex

Gidî va Huso bin’ Pîrajmonê ma dimon o ex

Gidî day Huseynê mi ex ay

 

Gidî va wexto Husê m’ lulî day hewa nono ex                                 (Hus lulbend bîyo.)

Gidî va lajê m’ kerron û lemon ca ra wî ver pêdono ex

Gidî day Huseynê mi ex ay

 

Gidî şar von’ bonê Husê la to sara ya ex

Gidî Husên mi va qarşî dişmenî yo la pencera ya

Gidî dayay Husên’ day Emîna ya ex

Gidî mi va cenîyay Husên la Zelîxa ya ex

Gidî mi va keynay Husên day Litîfa ya

Gidî yar û dostay Husên la mi Leyla ya ex

 

Gidî Husê m’ mi va Mistê Bêzi esker ra resawo ex

Gidî mi va lajê m’ cenîyon qal pêra wî çarnaynîyo ex

Gidî qal şî Mistê Bêzi ra va cenîyo ex

Gidî mi va Mist’ Bêzi şînê Hac Wisifê Şînî ra vaynîyo ex

Gidî mi va Hacî veynday wî Hustê xu daynîyo ex

Gidî day day way leyro ex ay

Gidî vaj’ te ra Husê m’ derdê la rî zerrî yo ex

Gidî vaj’ lajê m’ de rî aw mal-hal’ Wisifê Şînî yo ex

 

Gidî xu r’ ber’ bid’ qalinî cenîyo ex

Gidî va te ra “Husê m’ bê fek meerzi cenîday marîyo” ex

Gidî Hus von’ “mi na fekê la to şarîyo” ex

Gidî way day way leyro ex ay

 

Gidî wexto Husî la ona vawo ex

Gidî wilay Hacî kilaw day hewa nayo ex

Va “Husê m’ Ellay to belay’ to dawo” ex ay

 

Gidî mi va Hacî veynday la qewmî dawo ex

Gidî mi va Hacî barê la xu wenawo e

Gidî Terxenî mon di ronawo ex                                         (Terxene nameyê yew dew o.)

 

Gidî mi va Hus Pîrajmon di verdawo ex

Gidî Husê m’ warê la dişmenon o ex ay

 

Gidî Husê m’ na Leyla bî şonay bizono ex

Gidî willay kê vênena la ti ra vono ex

Gidî bow Husê Hacî ra vaj “Huso meraku serdê bonono” ex

Gidî mişewrey to zav bîyo girono ex

 

Gidî day vona “Husê m’ bê raku la rî odîyo” ex

Gidî Hus von’ “day ti cilay m’ bonci serdê odîyo” ex

Gidî topê in’ Pîrejmon Husên la to rî bîyo ex

Gidî vona mi d’ kenî yarîyo ex

 

Gidî Husê m’ şew şîya nêmey şewono ex

Gidî willay şar’ Qisni henî yo veynday pê dono ex             (Qisni, a mintiqa de nameyê yew cayî yo.)

Gidî va Husê mi nîno la Qisni mono ex

 

Gidî Hus xo aqilawo, Husî radawo ex

Gidî Hus qatiri onta serdê eynîyo ex

Gidî cor d’ yena Leyla sira sipîyo ex

 

Gidî von’ “Huso ez aşiqê beşnay’ to nîyo ex

Gidî Huso ez aşiqê rindeyda t’ nîyo ex

Gidî ez aşiqê nomedê t’ bîyo ex

Gidî to r’ von’ Husê Hacî Şînîyo” ex

Day de way day leyro ex ay

 

Gidî Husê m’ şew şîya nêmey şewono ex

Gidî mi dî yew tifing teqawo ex

Gidî mi va Zelxay m’ bewnî day ay çina wo ex

 

Gidî va şar’ tifing Hustê la to ra nawo ex

Gidî mi dî Husê mi cêr ro vecyawo ex

Gidî demonçey’ xu girew la er o dawo ex

 

Gidî va “mi warday to demonçî nawo ex

Gidî qay to dişmenî r’ firset dawo?” Ex ay

 

Gidî mi va “Husê m’ çi yo, qay çi qewmîyawo?” Ex

Gidî va “day cilay m’ bonci serdê odîyo” ex

Gidî “day willay vengê xu meki wa çew nêzono la çi qewmîyawo ex

Gidî ez bîya birîndarê gulî yo” ex

Gidî “day sew gon Husê la to dir mono ex

Gidî Pîrejmon kena Şelay Heydonîyo ex                            (Şela Heydan nameyê yew dew o.)

Varyantê Yılmaz Barlasî - Dewa Zixirî Ra

Vîdeoyê Yilmaz Barlasî:

Vateyê Deyîri:

Gidî willay mi va şew şîya nêmey' lo şewon o 

Gidî willay mi va bîya teq teqayi tifingon o

Gidî  willay El Adê venday Nurî Hajî dono             (El Adê yew dewijê Huseyn Hajî yo û Nurî Hajî zî                                                                                            birayê Huseynê Hajî yo)

Gidî willay mi va von Huseyn Hajî lo birîndar o

Gidî willay mi va birîndar Huseyn lo ey Nexmeton o            (Nexmeton nameyê baba Huseynê Hajî yo.)

Gidî qatira qir berî ma Huseyn berî lo Pîron mîyon o

Gidî Hus von dayê wa dişmen' ma çî lo pey nêzono

Gidî leyro leyro leyro leyro leyro Huseynê mi

Gidî Huso leyro willay mi va qatira qir arda lo ser eynî yo

Gidî willay mi va vernî girew Leylay' Terhon o             (Terhi. yew dewa Miyeron(Arıcak) a.                                                                                                              Tirkî nameyê ci Cumhuriyet Mahallesi yo.)

Gidî willay mi va to rê vonê Huseynê  Hajî yo

Gidî Huso mi va ez meraqlî lo siftey' to bîyo 

Gidî willay ez aşiqê beşnay' to bîyo

Gidî willay pey sekena lo malê dînya yo

Gidî willay mi va xu'r to di kerdi yarî yo

Gidî leyro leyro leyro leyro leyro Huseynê mi

Gidî Huso leyro willay mi va nomey daykay' Huseyn Emîna ya

Gidî willay mi va nomey keynay' Huseyn Redîfa ya

Gidî willay mi va nomey cenay' Huseyn Zelîxa ya

Gidî willay mi va nomey waştay' Huseyn mi Leyla

Gidî willay mi va peynay' lacê mi dima ya

Gidî leyro leyro leyro leyro leyro Huseynê mi

Gidî may' to bimro lulbendê mi 

*Semedo ke redakte kerdişê waryantê Haj Omerî de mi rê ardim kerd, ez Mamoste Malmîsanijî rê sipas kena.