KUTIK BELEK

Hamnanî sera 2004î bi. Tam ino vîst seri ra ver… Ay hamnan mehla de yew xebati est bî. Banê di datê mi heri ra virazîyaybî û a seri wirdî datê mi tablaya bananê xo cêfînaynî û betonî ra newe ra tabla vistinî. Ez heşt new  serre bîya çini bîya. Sey mi gedeyê mehla zî camêrdan dest ra geyraynî û înan reyde xebetîyaynî. Hewna inawa yew rojî dima ma pêro xebatkarî kar caverdabi û vernîya banê datê mi Evnasirî de binê tuyera ey de şama xo werdinî.

Xebati heta fekê mexrebî ramitibî û semedê ino ra wexto ke ma şama xo werdinî, edî dîna tarî bîbî. Sey ina gami yeno mi vîr, binê a tuyeri de yew sofreyo hîra ser o erd de ma şama xo werdinî. A gami bawi Pîrani ra pey yew teksîya torosi ame fekberî. A teksî ey datê mi bî yan zî ey pîyê mi bî, nîno mi vîr. Ez vana qay ey pîyê mi nêbî. Labelê a gama ke teksî anti fekberan, weş vîre mi de menda.

Bawi reyde ez vana qay Keko zî ereba ra ame war. Keko yan zî bawi ra yewî, mi dî zereyê teksî ra yew heywano şenik vet û teber ra rona. Ewilî ma nêzana yew pisînga yan zî yew kutik o? Ma werê xo caverda o şîyê ey het ke eke yew kirte yo. Kirte ande şenik bi ke, kê vatinê qay hema newe maya xo ra bîyo. Sey yew pisîngi bile çin bi. Rengê ey sipî û sûr têmîyan bi. Labelê sûrê ey tam sûr nêbi, ‘’turuncu’’ bi.

Sereyê ey, linge ey û boca ey zaf şîrîn bi. Esas bi xo komple zaf şîrin bi. Ca de zera ma dekewti ey. Dahîna ver ma zaf kutikî miqat kerdbî. Kutiko ke tewr peyen ma miqat kerdbi, Kutik Guro bi. Ma Kutik Guroyî, Keko Mehmeşa reyde miqat kerdbi. Zafanê o wayirê Guroyî vejîyaynî, çimkî ma hema şenik bî. Cehde ser o yew ereba dabi Kutik Guro ro û geber bibi. (Semedo ke ma şafîî yê, ay wextan pîlanê ma ma ra vatinê kê nêvanî yew kutik ‘’merdo’’, kê vanê ‘’geber  bîyo’’. Ez nika ina çekuyi rojane de nêşuxilnena labelê semedo ke ay wextan ma ina çekuyi şuxulnaynî , mi waşt ke ez ewtîya de zî ina çekuyi bişuxilna. Labelê pîlê ma hema zî ina çekuyi şuxulnenî.)Semedo ke Kutik Guro geber bibi, bawiyînê ino kutik Pîran ra ma rê ardbi. Ay wextan yew kutikê datê mi Evnasir estbi ke nameyê ey zî ‘’Kutık Guro’’ bi. Labelê kutikê ma nêbi û ma rewna ra dexwaya yew kutikî kerdinî. Ma waştinê ke semedê miqatkerdişî ra yew kutik peyda bikerî. Bawiyîn zî semedê ino waştişê m ara, ma rê ay kirte ardbi.

Ez, birayê mi û gedeyê mehla ma pêro dormareyê ay kirteyî girewt ca de. Ande şîrin bi ke ma kerdinî ke ey biwerî. Ca de ma zer devisti ey. Weş mi vîr yeno ke a gam ima sofre ser ra nano  mîrazkerde girewtbi dabi ey. Tabî fekê ey ande şenik bi ke, zor şinabi biwero.

A şewi bî yan zî bade bi, nîno mi vîr; kam pana, o zî nîno mi vîr. Labelê semedo ke di renge ey bî, ma nameyê ey ‘’Kutik Belek’’ pana. Embazeya min û ‘’Kutik Belek’’î a şewi destpê kerd.

Ma ca de ey rê yew quli viraştbî vernîya mehla de. Çand wext dima banderê mehla bi û destpê kerd, kutikê datê mi reyde şewan siloyê mehla ser o lawaynî. Labelê yew lawayîşo zaf nerm û şîrîn bi. Gama ke destpê lawayîşî kerd, ma zaf keyfweş bîbê. Wexto ke lawaynî her hal xo het vatinê qay ez xof dana xerîban û înan mehla ra dûr tewşena. Labelê eke kê lawayîşê ey bigoştaritinî, kê vatinê kê şêrî alişkanê ey pey wirdî destanê xo bitewşî û ti ra hes bikerî. Ande şîrin bi.

Çar panc seri betim mi rê, aîleyê ma rê embazeyi kerdi Kutik Belek. Pîli bi, ma sewbina kutikan reyde ey verpîdaynî. Ma şînê heywanan, ma reyde ameynî û wayirê heywanan kerdinî sey yew şaneyî. Zaf yew kutiko biaqil bi. Çande xişn bînê, ande rind bînê. Rengê ey zî caran nêbedilîya û ay hewa sipî û sûr mend. Ino reng de qet kutik çinê bi ay wareyê ma de û semedê ino ra, renge xo reyde zî kutikanê binan ra cîya bi.

Kutik Guro reyde zî yew embazeya weş viraştbî. Wexto ke bawiyînê ey ard, Kutik Guro temam bi, xişn bi. Pa bi lawayîşî, heme çî Kutik Guro ra bander bi. Wexto ke pîl bi, wirdî pîya wayirê mehla vejîyaynî û pîya şînê sewbina kutikan reyde dexwa kerdinî.

Sera ke ez sinifê hewtî de bîya, yanî sera 2008î yan zî 2009î de yew rojo ke ez mektebi de ya, sey ina gami yeno mi vîr yew datzayê mi ame û a xebera xirabi day mi. Yew pîkabi vernîya mehla da cehdî ser o daybi Kutik Belekî ro û ey kiştibi… A gami mi nêzanabi ez çi hîs bikera, se bikera. Senî yew tepkî bida. Çand sanîye ez bêhîş bêhîş rîyê dayzayê x ora ewnîyaybîya. Ande ez qahrîyaybîya ke ez mektebî ra nêvejîyaya, nêşîya mehla. Linganê mi nêtewişt. Mi vatinê qay ez nêşîra meytê ey nêveyna, beno ke ina xeberi yew zûri vejîya. Labelê wexto ke paydosî de ez şîya mehla, mi dî ke xeberi zûri nîya. Kutik Belek edî ma reyde nêbi... Yewna ereba ey zî ma ra qerefnabi.

Vernîya mehlaya ma de cehde estbi û ino cehde zaf sixletin bi. Hilugilam ino cehdî ser o erebayan daynî kutikan, pisîngan û kergan ro. Ge ge daynî însanan ro zî. Dewi ra çand kesî ino cehdî ser o pirodayîşê ereba reyde gan dabi. Dahîna ver çand heb kutikê ke ma miqat kerdbî, semedê pirodayîşê erebayan ra geber bîbê. Gama ke erebeyê cehdî ser o vêretinî, kutikê ma şînê erebayan rê lawaynî û erebeyan zî daynî înan ro. Ina rewşi hema zî dewi de inawa dewam kena.

Heta ke ez pîl biba û banderê ereba ramitişî biba, mi tim sûc daynî erebeyan ro. Mi vatinê, çêra dane kutikan ma ro û înan geber kenî. Çimkî goreyê mi kutikê ma biaqil bî, sûc ey erebayan bi. Labelê gama ke mi destpê ereba ramitişî kerd, mi fehm kerd ke ino gûre inawa nîyo. Kutikî, pisîngî ûsn heywanî derheqê erebayan de zaf biaqil nîyê. Xover xo fînenê vernîya erebayan û kê qorna bicenî zî, xo nêdanî kinar. Mi fehm kerd ke sey kutikê tayê heywanî, viraştişê xo de hema banderê erebayan nêbî. Vera erebayan de nêzanaynî senî têwbigeyrî û zaran fêm nêkerdinî ke ereba, zirar dana dînan.  Tû kes nêdibi ereba senî daybi Kutik Belek ro labelê îhtîmalo pîl, Kutik Belek nêheq bi.

Kutik Belek dima Kutik Guro seran reyde emir kerd. Yew ereba zî pay linga ey nabi û zafê emire xo topal vîyarna. Heta seranê 2015-2016î emir kerd û vera extîyareyi ra merd.

Wa cayê to weş bo Kutik Belek. Ez to ra zaf çî bander bîya. Nika ez ferq kena ke, pîlbîyayîşê mi de viraştişê nasnameyê mi de Kutik Belek wayirê cayêko pîl bîyo. Zaf şansê mi estbîyo ke mi Kutik Belek reyde embazeyi kerda.