Barış Akarsu, Islak Islak û Gedeyîya Mina Honiki

Perey şewi ez cayêk de ronişte bîya. Sey heme mekanî, weyra de zî mûzîk cenaynî. A gami ez zî fikirîyaynî, gelo ez ina aşmi çi binusa blogi de. Mi dî nişka ra yew deyîra zaf şinasî destpê kerdi… Senî ke ina deyîri destpê kerdi govdeyê mi, hîşê mi nemir bi. Deyîrbazo tirk Barış Akarsu ra ‘’Islak ıslak’’ bî ina deyîri. Hema ca de mi xo bi xo va, babeta nuşteyê ina aşmi zî vejîyayi…

Klîbê ''Islak ıslak''î ra yew dîmen

Hewna inawa yew aşma temmuzi bî. Sera 2007î… Veyveyê datkeyna Nayda û datza Mehmed Tahîrî bi. Ma şewi şîbî Bîrbawkal veyve. Veyve ke qedîya ma ageyrayî keye. Fekberê datê mi Evnasirî de keynaya ey Mentîha bermaynî. Ma dormareyê ya de kom bî ke eceba çîra bermena. Mentîha hesiranê xo gurnaynî û yew kinarî ra zî qalkerdinî. Mi dî va,

- Barış Akarsu merdo.

Ma çand sanîye mat mendî. Ay wext ma pêrinan Barış Akarsuyî şinasnaynî. Çimkî ay wextan rêzêfîlmê Yalancı Yarim de sey serkarakter kaykerdinî û ma pêrinan ino rêzefîlmî taqîp kerdinî. Ma zaf ino rêzefîlmî ra heskerdinî zî. Ma xortan zer devistbî Nazi(Merve Sevi), keynekan zî zer devistbî Tarıkî(Barış Akarsu). Mentîha zî ay wextan ciwan bî û semedo ke Barış Akarsuyî ra zaf hes kerdinî, vera mergê ey ra zaf qahrîyaybî. Labelê ma zî qahrîyaybî ina xeberi ra. Lewê ma zî degeyraybî. Ez hema 11-12 serre bîya labelê weş mi vîr yeno ke mergê Barış Akarsuyî û ay halê datkeyna Mentîha zaf zorê mi berdibi.

Mergê Barış Akarsuyî dima rojan reyde televzîyonan de xeberê ey vêretinî. Qanalê mûzîkî zî hilûgilam deyîranê ey cenaynî. Inê deyîranê ey ra xususen deyîra ‘’Islak ıslak’’î zaf weş ba mi şînê. Tene vate û mûzîkê deyîri ney, klîbê deyîri zî zaf weş ba mi şînê. Ay klîb mi rê zaf cool ameynî. Ez hema zî klîb de têbestişê Barış û embazanê ey zaf begom kena. Mi ay wextan xo bi xo vatinê, ko yew roj ez zî inawa xo têbesta.

Ey ay wextan ne komputuri ne zî telefon ma dest de est bi. Gama ke deyîra ‘’Islak ıslak’’i vejîyaynî televîzyoni, ez vazdayîşî reyde şînê mi vengê televîzyoni daynî tewr peyen û dima mi vengê xo yê nêbeye reyde ‘’Islak ıslak’’ vatinê. Mi anê Barışî reyde ina deyîri vatinê, labelê tek problem vengê mino nêbeye nêbi. Mi vateyanê deyîri zî tam nêzaynî û semedo ke Barış qirrîyayîşî reyde ina deyîri vano, mi kerdinî nêkerdinî mi nişnaynî vateyanê deyîri fekê ey ra tam bander bo.

Ay wextan çalakîya ma ya tewr weşan ra yewi, dewi ra Pîran şîyayîş û înternet kafe de nêm saet zî bibo, xo sey wayirê yew komputuri hesibnayîş bi… Cay yew di mîllin pereyî ma dest kewtinî, ma pey ay peran yew di embazî şînê Pîran û înternet kafe de ay peran xerç kerdinî. Zatenî şîyayîş û ameyîşi de kes ma ra heqê rayîrî zî nêgirewtinî. Çimkî ma şenik bî. Ge ge zî malimanê mektebî yew odew daynî ma û ma semedê ay odewî ra şînê înternet kafe û wayirê kafeyi yew çıktı vetinê dayni ma. Dima zî pancas henzar(50 quriş) pereyê xo girewtinî. Ez zî fikirîyaya, mi va gelo ez şîra înternet kafe û kafecî ra vaja, wa mi rê vateyanê deyîra ’’Islak ıslak’’î vejo nêbeno ? Qay wa çîra nêbo? Mi inawa va û ez yew roj şîya Pîran. Ûçeyolê Pîranî de Yakamoz Internet Kafe estbi ke her xortê Pîranî îllehîm yew ray şîyo zereyê ino kafeyi. Mi weyra de vateyê ina deyîri kafecî ra yew A4 ser o girewtî û ez vejeya şîya dewi. Sey ina gami mi vîr yeno ay vateyanê deyîri kaxidî ra wendişê mi. Mi a gami ferq kerd ke çekuyê ke weyra de nuştinî û çîyê ke mi televîzyoni reyde telaffuz kerdinî, sey sîya û sipî yewbinan ra cîya bî:):) Mi fekê xo de tayê çekuyê bêmanayî gindirdaynî û inawa Barış Akarsuyî reyde ’’Islak ıslak’’ vatinê.

Edî yew kaxit mi dest de bi û mi şinaynî bêxeta ina deyîri biwano. Ay roj mi destpê kerd û heta şewi mi deyîri ezber kerdi. Weyra ra pey ez vana qay yew di seri bêtim, keye de mekteb de yan zî yaban de, hema kura de mi vîr biameynî, mi ’’Islak ıslak’’ pey vengê xo ke vengê qixikî manaynî, wendinî. Mi vengê xo zî zaf berz kerdinî, çimkî Barış zî ina deyîri bi vengo berzî reyde wendinî. Wendişê mi gerek ey bimanaynî...

Heyranîya mi bi Barış Akarsuyî inawa seran reyde dewam kerdi. Heta ke mi lîse de wendinî zî telefonê mi de yew karmata fitrafê ey estbî. Yew wextirawext zî profîlê mino facebookî de fitrafê ey estbi.

Ez tîya de lînkê ina deyîra weşi rona, beno ke şima zî bigoştarî.