Keso Ke Deyîra Ey Nêameya Vatişî Ser O Yew Nuşte

Însan, ge ge tayê derd û dejanê xo şinasîyanê xo reyde bar keno. Inê şinasî aîle ra benî, embazan ra benî yan zî mavajî cenî bena, waşta bena. Inawa pey barê ay mêrdimî sivik beno. Zafê mêrdimî inawa kenî. Ez zî ê mêrdiman ra yew a. Raşta zî yew yew çî wexto ke kê zereyî xo de tewşenî, sey yew gota ke hetê golaragî ra gindirdîyena, roj bi roj xişn beno.  Rîyê ino ra barkerdiş, ge ge yew çîyo rind beno. Labelê ge ge… Tayê dejî zî estê ke kê qayil nîyê tû kesî ra behsê înan bikerî. Kê qayil nîyê xo ra zî bile behsê ay dejî bikerî. Kê vanê qay wexto ke kê behsê ay dejî xo kerd, kê qiymetê ey kêmnenî. Kê ey rê îxanet kenî. Kê ey sivik kenî… Çîyo ke ino nuşte de ez behsê ey kena, inawa yew çî yo. Seran reyde mi nişna xo rê abikero ina babeti. Mi nişna xo mîyani de muhasebeya ey bikero. Ino dej key ame mi vîr, mi sereye xo ra deh kerd. Mi dûr vist xo ra û ez ti ra perraya. Mi zanaynî ke peynî peyen ino dej, mi tewşeno û edî ez nişna ey ra biperra. Çimkî perrayîşî reyde yew emir nêvêreno. Emir, semedê perrayîşî ra zaf derg o. Inawa zî bi. Dejo ke ez ti ra perraynî, ino çand seri est a ke girneyê mi ra disayo. Ez kura şona mi reyde yeno. Kê vanê qay naka ma pêrabeste ya. Her hal ez zî edî qayil nîya ti ra biperra. Labelê hewna zî ez xo tewşena û qayîl nîya fek xo ra verada. Yan zî xo însafê ino dejî rê caverda. Çimkî gerek yew şekil ino heyat bêro temomkerdiş.

Mi hesabê xo facebookî hema zî nêqefilnayo. Ez ge ge dekuwena û ewnîna maveynî însanê weyra de sekenî. Heto bîn ra ez facebook yew şeklo weşî de şuxulnena. Mi weyra de pêro bîldîrîmî padayî labelê tene yew tewir bîldîrîmê akerde verdayî. O zî bîldîrîmê rojbîyayîşî yê. Yanî wexto ke embazanê mi facebookî ra rojbîyayîşê yewî bibo, facebook mi rê bîldîrîm şaweno. Ez zî ay mêrdimî rê telefon reyde mesaj şawena û rojbîyayîşê ey barkên kena. Inawa zafê nas û dostî keyfweş bîyê ina hereketa mi ra.

O zî facebooka mi de embazê mi yo. Mi tarîxê rojbîyayîşê ey zanaynî labelê mi vîr nêamebi.7 temmûz, sey her yewşemeyî yew rojo normal bi. Ez ay roj tayê erey wariştbîya hewnî ra. Mi arayîya xo hedre kerd û ez masa ser ronişta. Mi telefon akerd ke fitrafê profîlê ey ha ekranê telefonê mi ser o yo… Bîldîrîmê facebookî de inawa nuseno: ‘’ewro rojbîyayîşê ... Sertî yo, barkên bikê!’’

Eke weş bibînê ay roj 38 serre bînê. Beno ke tayê gijikê ey rişaynî, beno ke tayê sipî bînê. Beno ke gedeyanê ey semedê ey ra pasteyê rojbîyayîşî viraştinî. Ez vana qay weşîya xo de qet rojbîyayîşê xo barkên nêkerdb

Ay roj bêtim ay bîldîrîm û fitrafê ey ke profîlê facebookî de şuxulnabi, yew kinara telefonê mi de vinderte bi. Mi kerdinî nêkerdinî mi nişnaynî ay bîldîrîm weyra ra pank bikero. Kam gami mi telefon bigirewtinî xo dest, çimê mi fitrafê ey ginaynî.

Ne mi a arayîya xo ra ne zî ay rojî ra çî fehm kerd.

Ez nêzana se beno inawa. Mi çand serî ra ver fîlmê ‘’Müslüm’’î temaşa kerdbi ke ino fîlm behsê heyatê deyîrbazo tirk Müslüm Gürses kerdinî. Yew sehneyê fîlmî de serqerekterê fîlmî Timuçin Esen yew qali kerdbî. Vatinê, ‘’kê yew yas tewşenî, yew emir vêreno.’’ Ay rojî ra ina qali nêşona mi vîrî ra. Gelo ino emir yew yasî reyde vêreno ? Qet sivik nêbeno ino bar ?

Vanê, ‘’wext, dermonê heme çî yo.’’ Ez nêzana ino nêbo nêbo ge ge tersî ra bişuxilîyo? Nêke çîr ina kuli vera vera giron bena ? Yew bîldîrîmê facebookî de merdim senî fetesîyeno?  Mêrdim senî merg reyde serî şino ? Şino şîro?

Raya ewilîna ke ez yew nuşte de behsê ina kuli kena. Mi dahîna ver inawa nêkerdbi. Beno ke nuştiş, tikêna barê mi sivik bikero. Yanî zî beno ke barê mi bêqiymet biko. Nêzana ez. 

Şeş seri ra pey ez ancax to ser nusena. Ancax mi şina hêz bido xo. Hêzê mi ewtîya de qedîno. Mi waştinê ke inawa nêbo. Mi zaf waştinî.