THE HATEFUL EIGHT SERO

 DESTPÊK

Fîlm de yew erebaya postayî, Wyomîng ra vîyarena. Ay dem de, Wyomîng de serdê zimistanî hûkm keno. Cellat John Ruth û qeçaxa ci Daîsy Domergue, ina ereba de raywanî û semedo ke Daîsy Domergue teslîmê edaletî biba, şinê qezaya Red Rock. Rayir de raştê di merdiman yenê.

Yewîn, Marquis Warren o.  Ino merdim, seydwanê xelatî(odul avcisi) yo û yew eskero verên o. 

Diyin zî Chris Mannix o. Ino raywan zî goreyê îddîaya xo, şerîfê qezaya Red Rockî yo. La esil bi xo başurî ra yew eşqiya yo. 

Heme çar raywanê ma raştê yew firtinaya pîl yê vewrî yenê û rayirê xo vîra kenê. Riyê ino ra sereyê yew koyî de xo fînenê yew kerwanxan. Nameyê kerwanxanê ma Mînnîe's Haberdashery(Kerwanxanê Mînnîesî) yo. 

Raywanan, kerwanxan de raştê wayirê kerwanxanî ney, raştê çar kesê xerîbî yenê. Inê kesî dor reyde inê yî:

Bob, semedo ke Mînnîes maya xo zîyaret keno, wayirê kerwanxanê ci vecîyeno. 

Oswaldo Mobray, celladê Red Rockî yo. 

Joe Gage, qovboyêk o.

Û Sanford Smîthers. 

Nameyê fîlm de heşt vêreno la kesê ke fîlm de yahût kerwanxanê de yenê vera ma heşt tenî ra vêşîr ê. 

DERHEQÊ FÎLM DE MEHNAYA PÊROYÎ DE

Fîlm, sey fîlmê Westernî ameyo kaşkerdiş, hetê Quentîn Tarantîno ra. Fîlm hema hema bitemamî  kerwanxanê Mînnîesî de vêreno. Eke fîlmê şima tek mekan de vêreno, gerek dîyalog û senaryoyê şima biquwwet bibo ke şima serkewte bibê. Tarantîno, ino xusus biserkewtişî reyde ano ca. Seke şima zanê Tarantîno, hetê dîyalogan ra serkewte yo.

Fîlm hewayo ke tede vîyareno, temaşekarê xo rê zî dano hîs kerdiş. Temaşekar ekran ver de cemidîyeno. Destpêkî fîlmî ra heta peyen ina atmosfera fîlmî dewom kena. 

Firtinaya vewrî saet bi saet kerwanxan gêna binê bandora xo. Bandora firtinayî çand hêz bena, beyntarê heşt geyrayoxanî ma de nakokî zêde bena. Yew saet ra pê her sere yew hawa ceneno. Amanc û rayirê her kes cîya yo ino kerwanxan de. Her kes asayişê(gorunuş) xo ra cîya yew kes o/a. Bawerîya kes bi kesî çina heta yew ca. Gêrayoxê ma yew saet ra pey, ewnîyenê ke ino kerwanxanî ra xelesîyayişê înan, beno ke mûmkun nêbo. Ino fehm kerdiş, têwgeyrayişê înan rê tesîr keno.

Fîlm de hema hema bitemamî dîyalogî hersinî la komîkî zî. Hem temaşekar huynenê hem zî kelecanî danê. Seke şima zanê ino terzê Tarantîno yo. O temaşekraê xo hem huyneno hem zî meraq mîyan de verdeno. Fîlm de ino ware de berê kerwanxane detayêko weş o. Kam berê kerwanxane akeno, semedê padayişî ra gerek mîxan bero ser  bikewo. Nêke ber nêpadîno. Ino sehne temaşekarî huyneno la esil bi xo her qerekter mîxanê tabuta xo kuweno. 

FÎLM SERO ÇAND REXNEYÎ

Peynî peyen, fîlm de her kes mireno. Mehkumê mergo her kes. Tek cûmle reyde ma eşkenî wîna vacî.

Heto bîn ra şuxulnayişê vengî û mûzîk bêqusir bîyo hema hema. Zimistan tena çiman ver nêno. Goşanê temaşekarî rê tesîr keno.

Senaryoyê fîlmî her çand bitesîr bibo zî, çand xetayê mantiqî estî. Mavacî înê çeteyê Domergue semedê kiştişê inê merdiman çêra ande pawenî û peynî peyen de mirenê?

Erebaya Postayî

Tansîyon û nakokî ke têkilîya qerekteran ra peyda bena, zaf weş yew şekil de şuxulîyaya. Temaşekar hilûgilam fikirîyeno. Kam hekqar o, kam raşt vano? Ino xusus temaşekar dano fikirîyayiş. Sey fîlmê 12 Angry Men( 12Merdimê Hêrsbîyaye), temaşekar nêeşkeno fehm bikero ke qerekteran ra kam raşt vano. 

Temaşekar hilûgilam peynîya fîlmê sero fikirîyeno la Tarantîno ''Tak!'' yew qerekter fîneno orte û derheqê peynîya fîlmê de çikê fikirê temaşekarî estî, xelet vecîyenê.  Nişke ra temaşekar ewnîyeno ke fîlm, şeklêko  ecîb de qedîyeno. 

GÎTARA KE DAÎSY CENAYNÎ Û HETÊ RUTHÎ RA AMEYÊ PARÇEKERDIŞ

John Ruth raştê Warren yeno

Tarantîno, semedo ke fîlm seranê 1870an de vêreno, yew gîtara ke ay seran de virazîyaya wazeno. Ina gîtare, mûzeya Martînî ra wazîyena. Qiymetê ina gîtare des henzar dolaran ra vêşîr bî. Riyê ino ra Daîsy rê yanî Jennifer Jason Leîgh rê ame vatiş ke wa zaf diqat bikera. La ino xusus John Ruth rê yanî Kurt Russel rê nêvacîyebi. O zî goreyê senaryo hereket kerd û ina gîtara xususî parçe kerd. Qirîya ke şiktişê gîtar dima Daîsy veti, semedê ino xusus ra yo. Yanî qirîya senaryo nîya. Eke temaşekar hîşê xo sîyeno, fehm keno ke ina qirîya Daîsy senaryo reyde nakokî bîya. Ez lînkê ino sehne tîya de ronena. Şima tîya bitiknê, bes o.

Mûzeya Martînî ina serebute ra dima, semedê fîlman ra enstruman dayiş qedexe kerdo. :)

Zaf sipas keko Tarantîno.

DERHEQÊ EDALETÎ DE VATIŞÊ OSWALDO MOBRAYÎ

Fîlm de dîyalogê tewr başan ra yewî, derheqê edaletî de vateyê Oswaldo Mobrayî yo. Semedo ke nuşte derg nêbo, ez tîya de nênusena la temaşekarî wexto ke fîlm temaşe bikerî, weşîya ino dîyalog ko fehm bikerî. 

SONUC

Fîlm çand kinaran ra xetayanê mantiqî îhtîva biko zî qalîteya asayişî(Goruntu kalîtesî) zaf serkewte ya. Senaryo, dîyalogî û kaykerîya qerekteran fîlm zaf aver benê. Fîlm xo mîyan de zaf detayanê xorînan îhtîva keno û beno ke her temaşekar inê detayan ferq nêkero.

Peynî peyen de ma eşkenî vacê ke ino fîlm eserê westayîya Tarantîno bîyo.