LÎÇIKA BÊBEXTI

 Ino çele de yew serebûta ecêbi ameyî mi serî ser û nuşteyê aşma çeleyî zî inawa vejîya. Ez wazena ke ewtîya de sere ra heta peynî behsê ina serebûti bika.

Sernewe de ez yew hefte des roj ameya Mûşî ra ameya Dîyarbekir û mi sernewe Dîyarbekir de vîyarna. Yew roj ez Dîyarbekir de keyê waya xo şeniki Delal de mendinî. Keye de Delal, gedeyê aye Onur, vistirîya aye û di hîrê heb eyelê vistirîya aye est bî. Vistirîya waya mi, emika min a û wayirê yew nêweşîya giran a. Çand wext estbi ke semedê nêweşîya xo ra Dîyarbekir de mendinî û ay roj eyelê aye, waştinê ke ya bigê berî dewi. Emzayê mi mi ra va, ereba to de est a, ti ma bigiri beri dewi. Mi zî va, temom. Zatenî ez zî hema Dîyarbekirî ra nêşîbîya dewi. 

Ez, Delal, Onur û emikinî ma pêro ereba weyniştî. Ereba pir bî. Labelê yewna raywani zî ma reyde bî. Yew lîçika kergi... Yew lîçika sîyayi... Hema yew di hefte bibi çinbi ke maya xo ra bîbê. Onur hîrê nîm serre yo û wexto ke emikinî dewi ra ameybî Dîyarbekir, ina lîçiki semedê Onurî ra xo reyde anê ke pey hewîya ey bêra. Labelê lîçiki tim wîçnaynî û zîçê xo kerdinî zereyê keyî de. Yew lîçiki tene miqatkerdiş zî mûmkin nîyo û zatenî lîçika kergi, heywanê kedî(evcil hayvan) zî nîya. Delal zî va, ma xo reyde tapa berî dewi. Semedê ino ra emika mi lîçiki dekerdi zereyê pilîşê fistanê xo û kişta mi de koltuxa vernî de ronişti. Ma kewtî rayîr. 

Labelê lîçiki zereyê pilîşê fistanî de yew sanîye nêvindertinî. Yew vengo berzî reyde tim wîçnaynî. Ma da des kîlometre şî nêşî, mi edî nişna tehemûl bikero. Seke zereyê sereyê mi de wîçnena. Erebaya mi zî hatchback qasa ya. Eke mi ya bidekerdinî bagaj zî, hewna vengê aye ameynî mi. Teselîya mi kewti û mi torpîdoyê ereba akerd û mi emiki ra va, ya bigiri yew çali ra pêşi û deki zereyê ino torpîdoyî. Emiki zî ca de vateyê mi caard û liçiki yew çali ra pîşti, dekerdi zereyê torpîdoyî. Mi zî kapaxê torpîdoyî pada. Ca de vengê liçiki birîya. Mi va, oxx, ma ino bela ra zî xelesîyayî.

Lîçiki zereyê torpîdoyî de wîçnaynî labelê edî vengê aye zaf sist ameynî goşanê ma. Kê ino vengo sistî ra eciz nêbînê. Ma inawa giran gira şîyê û dewa emikînî resayî. Kom û kulfetê înan tek tek robîyê ereba ra. Emiki zî robîyi û teberê ereba ra mi ra va, hela a lîçiki zî bidi mi. Mi kapaxê torpîdoyî akerd û mi çali kaş kerd ke ez çi biveyna, orte de lîçik mîçik çin a! Vengê aye yeno labelê zereyê çali de çin a! Zereyê torpîdoyî de yew di şeqalî est bî ke kê nêzanaynî inê şeqalî şinê kam cayê ereba resenî. Vîçwîçê lîçiki zî peyê vîtesî ra ameynî. Ti mevaji ke lîçiki inê şeqalan ra şîya zereyê ereba û ameya nizdîyê qutîya vîtesî yew ca. Mi ke goşê xo da bere, mi fehm kerd ke vengê aye peyê qutîya vîtesî ra yeno. Ma weyra fekê berê emiki de kerd nêkerd ma nişna lîçiki ereba ra vejo. Mi qaputê ereba zî hewena, labelê veng bi. Lîçik wîçnaynî labelê ma nişnaynî xo aye biresno. Peynî de teselîya ma kewti û mi lîçiki awa caverdayi, ez Delal û Onurî reyde ageyraya dewa xo, dewa Dêran. Rayîrî de Onur tim persaynî, lîçika mi se bena, lîçika mi key vejîna? Onur zî yew hawa yew gede bi ke qalan ra qoma ey xişn nêbînê.  Emrê xo ra qoma xo ra pîl qalan kerdinî û rîyê ino ra heme kes ey ra hes kerdinî. Semedo ke tirkî nêzanaynî û zazakî qal kerdinî, qalkerdişê ey dahîna weş û şîrin ameynî kê rê. Lîçik wîçnaynî bes nêbi, ay rayîrê dewa ma ser o zî  a lîçiki reyde wîçnaynî. Ez ewnîyaya ke zaf qalê lîçiki keno, mi Delal ra va, ez ey rê di heb mîçikanê kedî(evcil kuş) bigira şima miqat kenî? Delal  va, miqatkerdişê înan zehmet nîyo, kê kenî. Mi zî va, ez ey rê ay hewa di mîçikanê muhabbetî bigîra ke ina lîçiki xo vîr bikero. Nêke ino mêratmende tesil ina lîçiki xo vîr ra nêkeno û sereyê mi weno!

Ma Dêran resayî. Rayîrî de ne lîçika sîyayi ne zî Onur vindert. Vengê lîçiki kê eciz nêkerdinî, sist bi labelê yew sanîya nêvinderti. Tim wîçnaynî. Mi ke fekberî de ereba park kerd, mi torpîdo akerd, yew camê ereba zî tayê rona û ma şî zereyê keyî. Keye de ma dayîyên ra behsê ina serebûti kerd. A roj heta orteyê şewi di hîrê ray gedeyî şîyê zereyê ereba ra ewnîyayî, maveynî lîçiki vejîyaya yan nêvejîyaya. Labelê vengê lîçiki ameynî, a bi xo orte de nêasaynî. 

Rojo binê ez senî ke warişta, ez şîya lîçiki ra ewnîyaya. Labele zereyê ereba de, zereyê torpîdo de çîyêk çinê bi. Heta vengê lîçiki zî birîyabi. Mi xo bi xo va, tesil lîçiki abîş rîyê serdî ra merda. 

Na ray ay roj tersê yew çî dekewt zereyê mi. Gelo ina lîçiki eke zereyê ereba de merda, ko îllehîm boya a zî yew wextî ra pey bikewa zereyê ereba. Eke ay hewa yew çî bibo kê nişnaynî zereyê ereba de vinderî. Rîyê ino îhtîmalî ra keyfê mi pera û ez behcîyaya. Ez gam Dalal ra gam Onurî ra gam zî emika xo ra hêrs bîya. 

Hewna ez fikirîyaynî ke eke inawa yew îhtîmal est o, gerek ez rew vernîya ino îhtîmalî bigîra. Mi ay roj da piro ez şîya merkezê Pîranî û yew di heb tamîrcîyan geyraya. Ez kam ra persaya, vatinê heta ke ma sîneyê ereba(araba göğsü) komple nêakerî, ma nişnê a lîçiki bivejî û îlawe kerdinî, heta ke boyi nêdekewta ereba, bê ma ereba de bişuxilî, eke boyî dekewti kê boyi ra nişnê te de bişuxilî. Ez ke heqê destê înan persaynî, 500 kaxidî ra heta yew mîllar nêm fîyat vatinê mi rê. Mi zî fek ti ra verada û ez ageyraya dewi. Mi xo bi xo va, zatenî yew lîçika şenik a, eke bimira zî boya aye ino zimistan de ko çand roj birama? Mi inawa va û mi ti ra fek verada. Siûdê mi ra ay rojan de ayom, ayomê zimistanî nêbi û hewa germin bi. Eke lîçiki bimerdinî, boya aye ca de kewtinî zereyê ereba. 

Ay hîrê çar rojî de ne vengê lîçiki ne zî boya aye ameyi. Mi xo bi xo va, semedo ke lîçiki zaf şeniki bî, beno ke boya leşa aye zaf nêvejîyayi û nêameyi mi. Ez ina serebûti dima hîrê çar roj dahîna dewi de menda û badê ageyraya Mûşi. Mûşi de hewa zaf dahîna serd bi û xisusen şewan de kewtinê binê sifirî. Ez teştareyi ra pey Mûşi resaya. Rojo binê ez nimaj şîya ke ereba wenîşa, ez çi biveyna! Helheleyê boya merdeyî yena zereyê ereba ra! Hîşê mi ca de nêame sereyê mi. Mi zereyê ereba tikêna boyi kerd, eya ina boya merdeyî bî. Ti mevaji ke a lîçiki dewi de nêmerdbî, ay hîrê çar roj zereyê ereba de ganî mendibi. Çi werdbi, senî werdbi û pey ganî mendbî ez nêzana. Labelê eşkera bi ke lîçika ma ay çand roj zereyê ereba de ganî mendbi û senî ke ez şîbîya Mûş, deyaxê serdê Mûşî nêkerdbi û merdbî. Ez heyret mendbîya ke ay çand roj a ereba de a lîçika misqali senî emir kerdbi? Ay roj bêtim ez karî ser o ina mesela fikirîyaya. Teştareyi ez ageyraya keye û mi kişta bîna de ereba park kerd û ez vejîyaya keye ke werdê teştareyî biwera. Yew saet dima ez ameya war ke çand heb pisîngî ha dormareyê erebaya mi de geyrenî... Mi xo bi xo va, heme kes rizqê xo dima yo.