PAYÎZO PEYEN

Aşma teşrîna peyeni… Yan zî vatişê wareyê ma reyde aşma payîzo peyen. Sey aşmanê bînan yê payîzî, ina aşmi zî zafê şaîran rê deyîrbazan rê ûsn hunermendan rê bîya malzeme. Bi mehnaya pêroyî de mewsîmê payîzî, goreyê mewsîmanê binan zaf dahîna vîş hetê hunermendan ra yeno şuxulnayîş. Çimkî ino mewsîm wayirê yew hetê hunerkî(sanat) yo. Vateyêko meşhurî yê Cemal Süreya’yî ewtîya de ca de yeno kê vîr, ‘’ê binê mewsîmî yê, payîz hûner o.’’.

Çêra ino mewsîm inawa hetanê hunerkîyan îhtîwa keno ? Çêra kê ino mewsîmî de zerrîzîz benî ? Cewap zaf asan o. Çimkî ino mewsîm de seke xozayi(doğa) bi temamî mirena. Kê wexto ke teber ra ewnîyenî yew bêganeyi, yew bêkeyfeyi û bêşayîye yena çimanê kê ver. Teber de yew dram yew melankolîya est a. Ina melankolîya zî yew mehnaya hunerkîyi wenena payîzî.

Mewsîmê payîzî zî tewr zaf aşma teşrîna peyeni de bandora xo ma nawneno. Pelê daran roj bi roj kemîyenî, hewa serd beno û xozayi seke gan dana. Xususen wareyê Dîyarbekirî de mewsîmê payîzî esil bi xo ina aşmi de rîyê xo kê nawneno.

Ino çand seri est o mi xo ra fehm kerdo ke ina aşmi de tene darî pelanê xo nêrişnenî, tene xoza nêkewena hewnê mergî. Pelê mi zî rişenî, ez zî sey yew dara şalbêri zik û ziwa bena. Sebebê ey çîyo ez nêzana, labelê ina aşmi mi rê qet weş nîna. Payîzo pîl seke zereyê mi de qewmîyeno. Tehmê fekê mi qet çin beno.

Ino hîrê çar serî esto ke ina rewşi inawa ya. Beno ke dahîna ver zî her seri ina aşmi inawa vêretinî, mi vîr nîno. Labelê eşkerayo ke orte de çîyêko anormal est o. Beno ke astrolojî de cewabê ina rewşa mi est o, ez nêzana. La mi bi xo hema ino cewap nêdîyo. 

Payîz, semedê çand kesan ra inawa vêreno ez nêzana. Labelê goreyê mi, ‘’ê binê mewsîmî yê, payîz qehir o.’’.