Da vîst roji ra ver ez şewi pey ereba kuçeyanê Dîyarbekirî de geyraynî. Roj germ bi labelê a şewi weş honiki bî. Mi camê ereba ronaybî û vayo honik kewtinî zereyê ereba, daynî ridê mi ro.
Ay vayê honik yê Dîyarbekiri ez a gami berda pancês seri ra ver... Pancês seri ra ver Dîyarbekir de yew şewa honikî ya hamnanî... Kuçeyî, bînayî, însanî û baklawaya ke pancês seri ra ver mi rê xerîb bî ewro senî bîyê şinasîyê mi? Tek tek çimanê mi ver ra vêretî dîmenê a şewi. Ereba rayîrraşina, ez tarîx de tapa şina...
Bêrî ma pîya pancês seri tapa şêrî...
Ez des dîyes serre bîya çinê bîya... Nîno mi vîr tam. Dîyarbekirî de yew yayka mi emelîyat bîbê. Keyê ina yayka mi zî Dîyarbekirî de bi. Yew şewi pîyê mi, maya mi, waya mina pîli û ez ma dewi ra kewtî rayîr semedê zîyareta yayka mi... Ay wextan yew transportera zamayê ma est bî û ma pey ina erebaya zamayê xo şînê Dîyarbekir.
Yew şewa hamnanê yê Dîyarbekirî bi... Yew şewa honiki... Ereba da ca çinê bi yan zî yewna sebep bi, mi vîr nîno, ez bagajê transporteri de roniştbîya. Esil bi xo zaf çî nîno mi vîr a şewi ra. Mesela ma qalabalix yew aîle bî. Gelo çêra bawiyînê mi tene xo reyde berd? Normal de gerek mi zî sey way û birayanê mi bînan keye de biverdaynî labelê mi xo reyde girewt a şewi. Ez vana qay mi zaf israr kerdo ke ez xo rê bela kerda. Ey ay wextan ma Pîran bile zaf kêm dînê, kura de mendo Dîyarbekiri. Şewi zî biba, Dîyarbekir veynayîş semedê mi ra zaf çîyêko rind bi. Mi embazanê xo rê wextirawext pey payeyê xo kerdinî.
Welhasil ma şîyê Dîyarbekir. Rayîr kewtiş ûsn çîyê nînê mi vîr. Ma fekê mexrebî Dîyarbekirî resayî. Gama ke ma mîyanê Dîyarbekirî de geyrenî pey ereba, bawî camê ereba ronaybî û vayo honiki kewtinî zereyê ereba. Mi ra pêşîyaynî ez honik kerdinî. Ez zî sey yabanîyan camê ereba ra teber ra ewnîyaynî. Însanê, bînayî, erebayî ûsn çîyê zaf bala mi antinî. A gami ke ez teber ra ewnîyaynî ma yew meydani ra vîyartî ke ino meydan zaf qalabalix bi. Tam weyra de di heb keyneyê xortî vêretî peyê ereba ra û mi ra ewnîyayî. Serqot bî, xo boye moye kerdbi û artîstan manaynî. Mi ra ewnîyayî û hir hir huyayî. Mi peyê camê ereba ra çimê xo bilq kerdbî û ez sey vergî înan ra ewnîyaynî. Mi ewilî vatinê qay peyê camî ra ez nêdînê. Labelê dêmek ez asaynî teber ra.
Tînce amnanî ez qer kerdbîya. Ez seke aşikan ra peymende bîya. Mi ra yew hewa ewnîyayî û huyayî ke, seke henekê xo mi bikê. Rîyê ino ra badê zaf zorê mi şi huyayîşê ay keynekan. Hema zî ez xo vîr ra nêkena. Ay dîmen sey ewro yeno çimanê mi ver.Ereba weyra ra dûr kewti û heta ke ay keynekî çimanê mi ra vîndi bibê ez înan ra ewnîyaya.
Însanê Dîyarbekirî semedê ay honikî ra seke yew rayi helqetîyaybî û vejîyaybî kuçeyan.
Ma ay qalabalix mîyani de şîyê keyê yayî resayî. Gama ke ma ereba fekê bînaya yayî de park kerdi, bawi mi ra va, lajê mi şo berê ereba kontrol bikeri maveynî qefelîyayo. Mi hema ca de ho vist kinarê berê transporteri, ti mevaji a kinara berî kinara cehdeyî ra ewnîyaynî. Şans ra a gami daşti ra yew ereba zî bisûratî reyde vejeyî. A deqqa mi gama xo edilnayi û xo nêvist rayîrî ser. Ereba daşti ra ameyî û linganê mi ver o vêreti. Eke mi xo bivistinî rayîrî ser, îllehîm yew di emelîyetî mi rê zî lazim bînê...
Badê ma vejeyî keyî yayî. Ay seaten ra ene yew di çî yenî mi vîr. Mêrdeyî yayî, xalê mi Osman û yew di hebna mêrdimî balkona keyê yayî de roniştbî. Ez zî ca de înan het ronişta. Çimkî balkon ra teber asaynî kê ra. Bînayê binê, qalabalixê însanan ûsn... Heme çî bala mi antinî. Çimkî mi hema inê çî nêdîbî.
Vera bînaya yayî de yewna bîna de şarê yew keyeyî vejîyabi balkoni û govendi girewtinî. Ez pêt înan ra ewnîyaynî. Zaf nizdîyê bînaya yayî bî û vengê mûzîkê înan, rîyê înan pêro ma ra asaynî. Mi rê zaf ecêb ameynî. Seke ez yewna dîna ra bîya, şarê ina bajari yewna dîna ra... Têwgeyrayîşê înan, têbestişê înan ûsn heme çîyê înan seke yewna tewir bi.
A şewi keyê yayî ra sewbina çî nîno mi vîr. Tene ageyrayîşê ma mendo aqilê mi de. Rayîrê ageyrayîşî de bawi ereba yew petroli de edilnayi. Bagajê ereba de dewi ra xo reyde yew varîlo veng ardbi. Ay petroli de ay varîl pirê mazotî kerd. Bawi pey motori dewi de citkareyi kerdinî û semedo ke petrolanê Dîyarbekirî de mazot erjan bi, weyra de ay varîl pir kerd. Labelê ey mi tena gama ke mazot dekerdinî zereyê varîlî hîşê mi pêser bi. Tene a gami yena mi vîr. Ez weyra de kuştakewta. Weyra ra pey wexto ke ma ereba dewi de fekê berî de park kerdi û dayî ez hewnî ra wariznaya hîşê mi tayê ame pêser.
Rojo binê ez bander bîya ke bawiyînê gama ke varîl pirê mazotî bîyo, şîyê ay petrolî mîyani de yew pastaxane de baklawa werda û dima vejeyî... Yew wexto derg û dila, ez vaja hema zî a baklawa ra mehrum mendiş zorê mi beno. Zaf pîs zereyê mi de menda a baklawa. Eke ez ewro bizana ay petrol kam petrolo, ez şina pastaxaneyê ay petrolî de baklawa wena. Eke pastaxane qefelîyayo zî, ez teber ra baklawa herînena û bena ay petrolî de wena. Qay nêbo nêbo hesra a baklawa zereyê mi ra vejîya...
Şewi İzmirî zî honiki 😊
YanıtlaSil